Gwersylla yn y glaw

Paratoi ar gyfer gwersylla yn y glaw

Mae rhai o’r pethau pwysicaf y gallwch eu gwneud i gadw’n sych a sicrhau profiad gwersylla gwell yn digwydd cyn iddi fwrw glaw. Dylid gwneud rhai pethau cyn gadael cartref. Meddyliwch ymlaen llaw a byddwch yn barod.

1. Ewch â phabell dda â gorchudd glaw priodol. Efallai y byddwch am gael pabell â gorchudd glaw sy’n gorchuddio pob awyrell a ffenestr rwyll yn gyfan gwbl. Mae rhai pebyll tebyg i gaban wedi’u dylunio fel bod y gorchudd glaw dros y top yn unig, fel to tŷ, ac mae rhai pobl yn cwyno bod glaw’n chwythu drwy’r ffenestri. Gweler awgrym 13!

2. Ystyriwch brynu pabell sydd â chyntedd. Mae hyd yn oed rhai pebyll bach ar gyfer teithio â sach gefn yn cynnwys cyntedd bach. Mae hyn yn eich helpu i gadw’n sych wrth agor drws y babell. Mae rhai cynteddau’n ddigon mawr i storio offer oddi tanynt.

3. Gwnewch eich pabell yn ddiddos o bryd i’w gilydd â chwistrell ddiddosi. Gallwch hefyd selio’r semau â seliwr semau. Mae hyn yn ychwanegu haen amddiffynnol at eich pabell.

4. Gwiriwch y rhagolygon cyn pacio a gadael am eich taith wersylla er mwyn paratoi orau. Gwiriwch ragolygon eich cyrchfan wersylla, yn hytrach na’ch cartref. Gwiriwch hefyd am dywydd garw. Mae gwersylla yn y glaw yn un peth, ond nid yw’n syniad da gwersylla mewn stormydd difrifol os gellir eu hosgoi. Nid yw rhagolygon bob amser yn gywir ac mae rhai stormydd yn fyr, felly defnyddiwch synnwyr cyffredin.

5. Codwch eich pabell ar dir uwch. Os gallwch ddewis ble i’w chodi, heb fan penodedig, dewiswch dir uwch. Peidiwch â dewis y man isaf ar y safle na gwaelod bryn. Bydd yr holl law’n llifo i lawr ac yn cronni yn y man isaf.

6. Cadwch olwg ar ddŵr sy’n codi os ydych yn gwersylla wrth nant neu afon.

7. Dewch â tharpolinau ychwanegol!

8. Rhowch darpolin neu gynfas ddaear o dan eich pabell. Gallwch brynu cynfasau sylfaen wedi’u gwneud yn benodol ar gyfer rhai pebyll. Yn ogystal ag amddiffyn eich pabell, mae hyn yn ychwanegu haen arall rhyngoch a’r ddaear wlyb. Sicrhewch nad yw’r tarpolin yn fwy na gwaelod y babell. Gall unrhyw ymyl sy’n ymwthio allan achosi i ddŵr gronni o amgylch ac o dan eich pabell.

Mae rhai pobl hefyd yn argymell rhoi tarpolin ar y llawr y tu mewn i’r babell, ond nid ydym ni erioed wedi gwneud hyn.

9. Rhowch darpolin dros eich pabell os ydych yn poeni am ei chadw’n sych ac yn ansicr pa mor ddiddos ydyw. Os yw’n ddigon mawr, gall hefyd roi lle dan orchudd i fynd i mewn ac allan. Cofiwch bacio rhaff neu gortyn parasiwt ychwanegol ar gyfer y tarpolin.

10. Dewch â chynwysyddion neu fagiau diddos i storio eich offer. Er eich bod yn gobeithio y bydd tu mewn y babell yn aros yn sych, gall storio dillad ac offer mewn cynwysyddion diddos helpu i’w cadw rhag gwlychu. Os nad oes gennych flychau neu fagiau sych defnyddiol, dewch â bagiau sbwriel a bagiau mawr â sêl zip o leiaf.

11. Gosodwch fat y tu allan i ddrws eich pabell neu gartref modur i ddal mwd a malurion. Mae rhoi mat neu ryg bach y tu mewn i’r drws yn syniad da hefyd.

12. Codwch ganopi sy’n agor yn gyflym dros yr ardal bicnic neu ger eich pabell. Bydd hyn yn rhoi lle i dreulio amser a pharatoi bwyd allan o’r glaw. Os nad oes gennych ganopi, defnyddiwch darpolin ychwanegol i greu’r lle dan orchudd.

13. Caewch zipiau ffenestri’r babell i gadw’r tu mewn yn sych os yw’n bwrw’n drwm. Mae’n syndod faint o bobl sy’n dweud bod glaw’n chwythu drwy ffenestri eu pebyll tebyg i gaban oherwydd gorchudd glaw llai. Mae awyru’n bwysig, ond nid yw ychydig o anwedd cynddrwg â glaw yn chwythu i mewn! Gall fod yn boeth ac yn llaith yn yr haf, wrth gwrs.

14. Agorwch y drws a zipiau’r ffenestri pan fydd y glaw’n stopio. Bydd hyn yn gadael i’r babell awyru ychydig.

15. Dewch â rhywfaint o fwyd nad oes angen ei goginio. Gall fod yn anodd coginio os yw’r tywydd yn wael iawn.

16. Mae’n haws coginio ar stôf wersylla neu stôf fach ar gyfer teithio â sach gefn yn y glaw nag ar dân neu gril. Mae’r stofiau’n hawdd eu defnyddio o dan darpolin neu ganopi.

17. Casglwch neu prynwch goed cynnau a phren tân wrth gyrraedd, yn enwedig os nad yw’n bwrw bryd hynny. Dewch â’ch pren tân os gallwch.

18. Gorchuddiwch eich pren tân a’ch coed cynnau sych â tharpolin. Gosodwch y tarpolin ar y ddaear, rhowch y pren arno ac yna plygwch y gweddill dros y pren i’w gadw’n sych. Gallwch hefyd storio coed cynnau neu ychydig o bren tân mewn bag sbwriel cryf.

Efallai nad ydych yn bwriadu cynnau tân yn y glaw, ond bydd angen pren sych arnoch ar ôl i’r glaw stopio, gobeithio. Bydd y tân yn eich cynhesu ac yn helpu i sychu dillad sydd wedi gwlychu.

19. Sicrhewch fod gennych ryw fath o danwydd cynnau neu gynnau tân: naddion pren, fflwff sychwr dillad, blociau cynnau tân ac ati.

20. Peidiwch ag anghofio matsis diddos neu daniwr!

21. Gwnewch lein ddillad o gortyn parasiwt neu raff i hongian dillad gwlyb arni.

22. Peidiwch ag anghofio dillad glaw. Paciwch gôt law neu boncho. Mae het â chantel llydan yn ddefnyddiol, neu dewch â chap o leiaf. Mae rhai’n dod ag esgidiau glaw a phâr ychwanegol o esgidiau.

23. Dewch â thywelion. Byddwch yn falch o rai ychwanegol os cewch eich gwlychu’n llwyr. Mae’r rhan fwyaf o bobl sy’n aros ar faes gwersylla’n dod â thywel ar gyfer y gawod.

24. Dewch â digon o oleuadau. Gall cymylau a thywydd glawog wneud hi’n dywyllach. Sicrhewch fod gennych ddigon o dortshys, llusernau a batris.

25. Dewch â rhywbeth i’ch diddanu rhag ofn eich bod yn gaeth yn y babell, o dan y tarpolin neu’r canopi, neu yn y fan wersylla neu’r cartref modur.

26. Os yw’n ddigon cynnes, chwaraewch yn y glaw! Os ydych yn gwersylla gyda phlant, byddant hwythau’n cael amser gwych.

27. Cadwch yn gadarnhaol a chwiliwch am bethau i’w gwerthfawrogi os byddwch yn gwersylla yn y glaw. Manteisiwch ar y cyfle i arafu a mwynhau cwmni ffrindiau a theulu tra byddwch yn eich pabell neu gartref modur; gadewch i sŵn y glaw ar y babell eich siglo i gysgu gyda’r nos, a mwynhewch dirwedd Eryri ar ôl y glaw.